गोंदिया(अनिल मुनीश्वर):—————————————————— जिल्ह्यातील सडक अर्जुनी तालुक्यातील वडेगाव/सडक (पटाची टोली) येथे गुरुवार, दिनांक 26 मार्च 2026 रोजी भव्य मोफत रोगनिदान व आरोग्य महाशिबिराचे आयोजन ब्राम्हणकर मल्टीस्पेशालिटी हॉस्पिटल, गोंदिया यांच्या वतीने आयोजित करण्यात आले असून, गरजू रुग्णांना मोफत उपचार व शस्त्रक्रियेची सुविधा उपलब्ध करून देण्यात येणार आहे.
या महाशिबिरामध्ये प्रधानमंत्री जन आरोग्य योजना (आयुष्मान भारत) तसेच महात्मा ज्योतिराव फुले जन आरोग्य योजना अंतर्गत विविध गंभीर आजारांची तपासणी व शस्त्रक्रिया विनामूल्य करण्यात येणार आहे. यामध्ये स्तन कर्करोग, गर्भाशयासंबंधी आजार, पित्ताशय विकार, मूत्रपिंडातील खडे, प्रोस्टेट समस्या, अपेंडिक्स,हर्निया तसेच दंतविकारांवरील उपचारांचा समावेश आहे.
शिबिर सकाळी 9.00 ते दुपारी 12.00 राहणार असून नागरिकांनी शिबिराचा लाभ घेण्यासाठी आधार कार्ड, रेशन कार्ड तसेच जुनी वैद्यकीय कागदपत्रे सोबत आणावीत,असे आवाहन करण्यात आले आहे.
या शिबिरात तज्ज्ञ डॉक्टरांची टीम उपस्थित राहणार असून त्यामध्ये डॉ. नोव्हिल प्रभू ब्राम्हणकर (जनरल व लेप्रोस्कोपिक सर्जन), डॉ. प्रणय आकरे (जनरल फिजिशियन), मौसमी ब्राम्हणकर (आहारतज्ज्ञ), डॉ. गणेश्वरी ब्राम्हणकर (होमिओपॅथी तज्ज्ञ) तसेच डॉ. गौरी देवकाते (दंतचिकित्सक) यांचा समावेश आहे.
या सामाजिक उपक्रमासाठी निलेश चुटे (सचिव, झाडे कुणबी समाज, गोंदिया) यांचे विशेष सहकार्य लाभले असून आयोजन महेश मेंढे यांनी श्रीमद् भागवत राम मंदिर समिती वडेगाव/सडक येथे केले आहे.
“आपले आरोग्य हीच आमची प्राथमिकता आहे” या संदेशासह नागरिकांनी मोठ्या संख्येने उपस्थित राहून या मोफत आरोग्य महाशिबिराचा लाभ घ्यावा,असे आवाहन आयोजकांकडून करण्यात आले आहे.
