सडक अर्जुनी (अनिल मुनीश्वर):————–
येथील मनोहरभाई पटेल कला, वाणिज्य व विज्ञान महाविद्यालयाने राष्ट्रीय स्तरावर उल्लेखनीय यश संपादन केले आहे. महाराष्ट्र शासनाच्या सामाजिक न्याय व सक्षमीकरण मंत्रालयांतर्गत कार्यरत पब्लिक सेफ्टी असोसिएशन (COPS) यांच्या वतीने आयोजित राष्ट्रीय स्तरावरील वक्तृत्व स्पर्धा २०२५ मध्ये महाविद्यालयाच्या विद्यार्थिनीने घवघवीत यश मिळविले. ही स्पर्धा गव्हर्मेंट स्कॉलरशिप स्कीम अँड इट्स इम्प्लिमेंटेशन“ (शासकीय शिष्यवृत्ती योजना व त्यांची अंमलबजावणी) या विषयावर घेण्यात आली होती. या स्पर्धेचा उद्देश विद्यार्थ्यांमध्ये विविध शासकीय शिष्यवृत्ती योजनांविषयी जागरूकता निर्माण करणे हा होता. देशभरातील सहभागी विद्यार्थ्यांना ३ ते ६ मिनिटांचा वक्तृत्वाचा व्हिडिओ सादर करणे बंधनकारक होते. या स्पर्धेसाठी मनोहरभाई पटेल महाविद्यालयातून बी.एस सी. प्रथम वर्षातील कु.तेजस्विनी नाशिक बनसोड व निलेश वैद्य या दोन विद्यार्थ्यांची निवड करण्यात आली होती. दोन्ही विद्यार्थ्यांचे वक्तृत्वाचे व्हिडिओ स्पर्धेसाठी पाठविण्यात आले. सदर वक्तृत्व स्पर्धा तीन फेऱ्यांमध्ये पार पडली. प्रत्येक फेरीत स्वतंत्र व्हिडिओ स्पर्धेच्या अधिकृत संकेतस्थळावर अपलोड करणे आवश्यक होते. स्पर्धेचे मूल्यांकन २० टक्के ऑनलाइन पाहणीनुसार व ८० टक्के परीक्षकांच्या गुणांकनावर आधारित होते. उत्कृष्ट विषयमांडणी, प्रभावी वक्तृत्वशैली व सखोल माहितीच्या जोरावर बी.एस्सी. प्रथम वर्षातील कु. तेजस्विनी नाशिक बन्सोड हिने राष्ट्रीय स्तरावर तृतीय क्रमांक पटकावला. तिच्या या यशामुळे महाविद्यालयाचे नाव राष्ट्रीय पातळीवर उज्वल झाले आहे. त्यांच्या यशाबद्दल महाविद्यालयाचे प्राचार्य डॉ. चेतनकुमार मसराम, प्राध्यापकवर्ग व विद्यार्थ्यांनी कु. तेजस्विनी बन्सोड तसेच सहभागी विद्यार्थ्यांचे अभिनंदन करून त्यांच्या पुढील शैक्षणिक व सहशैक्षणिक वाटचालीस शुभेच्छा दिल्या आहेत.
