AGMNEWS24
लायंस क्लब गोंदिया सिविल च्या अध्यक्षपदी सौ.भावना कदम 
केशव ठाकरे सचिव, तर सौ. मंजुषा फुंडे कोषाध्यक्ष; १८ वर्षांची सेवा परंपरा नव्या ऊर्जेने पुढे नेण्याचा संकल्प
गोंदिया(अनिल मुनीश्वर): –
सेवा ही संस्काराची आणि मानवता ही उद्दिष्टाची भावना मनाशी बाळगून समाजहितासाठी सातत्याने कार्यरत असलेल्या लायंस क्लब गोंदिया सिविलचा वर्ष २०२६-२७ चा भव्य शपथग्रहण सोहळा ग्रीनलँड लॉन, गोंदिया येथे उत्साहपूर्ण व आत्मीय वातावरणात पार पडला. यावेळी शहरातील समाजसेविका व माजी नगरसेविका सौ. भावना कदम यांनी लायंस क्लब गोंदिया सिविलच्या अध्यक्षपदाची शपथ घेत नवीन जबाबदारी स्वीकारली.
नागपूर येथून उपस्थित राहिलेले माजी प्रांतपाल MJF विनोद वर्मा व शपथविधी अधिकारी MJF अरुण चतुर्वेदी यांच्या हस्ते नवनियुक्त पदाधिकाऱ्यांना शपथ देण्यात आली. यावेळी त्यांनी लायंस क्लबची सेवा भावना, नेतृत्वाची जबाबदारी आणि समाजाप्रती असलेले उत्तरदायित्व याबाबत मार्गदर्शन केले.
सेवा कार्यांचा विस्तार करण्याचा निर्धार
अध्यक्षपदाची जबाबदारी स्वीकारल्यानंतर सौ. भावना कदम यांनी सांगितले की, लायंस क्लब गोंदिया सिविलच्या गौरवशाली परंपरेला पुढे नेत वर्ष २०२६-२७ मध्ये सेवा कार्यांना अधिक व्यापक स्वरूप दिले जाईल. नेत्रसेवा व नेत्र तपासणी शिबिरे, आरोग्य शिबिरे, वृक्षारोपण, गरजू विद्यार्थी व लाभार्थ्यांना स्वेटर वितरण यासह विविध समाजोपयोगी उपक्रम राबविण्यात येणार आहेत.
संस्थेचे उद्दिष्ट केवळ कार्यक्रम आयोजित करणे नसून, जिथे गरज आहे तिथे संवेदनशीलतेने पोहोचून गरजूंच्या जीवनात सकारात्मक बदल घडवून आणणे आहे, असेही त्यांनी सांगितले.
१८ वर्षांच्या सेवा प्रवासाची गौरवशाली परंपरा
माजी प्रांतपाल MJF विनोद वर्मा यांनी लायंस क्लब गोंदिया सिविलच्या १८ वर्षांच्या सेवा प्रवासाचे कौतुक केले. सेवा प्रकल्पांसोबतच सदस्यांमध्ये निर्माण झालेला कौटुंबिक व आत्मीय संबंध हीच क्लबची मोठी ताकद असल्याचे त्यांनी नमूद केले.
क्लबचे संस्थापक MJF मुरलीधर माहोरे व चार्टर प्रेसिडेंट दीपक कदम यांच्या योगदानाचा उल्लेख करून त्यांनी क्लबला मजबूत सेवा परिवाराचे स्वरूप देण्यात त्यांच्या योगदानाचे कौतुक केले.
MJF अरुण चतुर्वेदी यांनीही नवनियुक्त पदाधिकाऱ्यांना शुभेच्छा देत पद हे केवळ सन्मानाचे नसून सेवा व जबाबदारीचे माध्यम असल्याचे सांगितले.
नवीन कार्यकारिणीने स्वीकारली जबाबदारी
वर्ष २०२६-२७ साठी सचिवपदी केशव ठाकरे, कोषाध्यक्षपदी सौ. मंजुषा फुंडे, सहसचिव किशोर पटले, सहकोषाध्यक्ष विनीता ठाकूर, प्रथम उपाध्यक्ष सौ. प्रांजलि बोरकुटे, द्वितीय उपाध्यक्ष गजेंद्र फुंडे तर तृतीय उपाध्यक्षपदी सुरेश बहेकार यांनी शपथ घेतली.
याशिवाय मेंबरशिप चेअरपर्सन हर्षद मेहता, LCIF चेअरपर्सन MJF मुरलीधर माहोरे, सर्विस दीपक कदम व डॉ. दुवारे, ॲक्टिव्हिटी दिलीप चौरगडे व प्रशांत बोरकुटे, लीडरशिप दुर्गा ठाकरे व आनंद ठाकूर, क्वालिटी कृतिका शैट, कश्मीरा संघाणी व चेतना कटरे, क्वेस्ट भुवन बिसेन, ममता कटारे व योगिता बिसेन यांच्यासह विविध समित्यांच्या पदाधिकाऱ्यांनी जबाबदारी स्वीकारली.
सर्विस वीक, पीस पोस्टर, पर्यावरण, भोजन, युवा संघटन, महिला संघटन, हेल्थ, क्लब बुलेटिन यांसह विविध सेवा व उपक्रम समित्यांचीही स्थापना करण्यात आली आहे. अनुभवी सदस्यांसोबत नव्या पिढीतील ऊर्जावान सदस्यांना संधी देण्यात आल्याने आगामी वर्षात क्लबच्या कार्याला अधिक गती मिळण्याची अपेक्षा व्यक्त करण्यात आली.
दीपक कदम यांचा वाढदिवस उत्साहात
शपथग्रहण सोहळ्यादरम्यान भाजपा सहकार नेते व चार्टर प्रेसिडेंट दीपक कदम यांचा वाढदिवस केक कापून उत्साहात साजरा करण्यात आला. यावेळी नगर परिषद अध्यक्ष सचिन शेडे, माजी प्रांतपाल विनोद जैन, राजेंद्र बग्गा, जोन चेअरपर्सन नितीन पुगलिया, प्रदीप जायसवाल, मजूर संघ अध्यक्ष बंटी मिश्रा, राजू एन. जैन यांच्यासह तिरोडा व नवेगाव बांध लायंस क्लबचे पदाधिकारी, राइस सिटीचे पदाधिकारी, मान्यवर नागरिक व मित्रपरिवार उपस्थित होता.
कार्यक्रमाचे प्रभावी संचालन किशोर पटले यांनी केले, तर आभार प्रदर्शन सचिव केशव ठाकरे यांनी केले. कार्यक्रमानंतर सर्व अतिथी व सदस्यांसाठी स्वरुची भोजनाचे आयोजन करण्यात आले.
नवीन कार्यकारिणीने आगामी वर्षात लायंस क्लब गोंदिया सिविलची सेवा भावना अधिक बळकट करून “सेवा से संतोष और सेवा से समाज परिवर्तन” या भावनेने अधिकाधिक गरजूंपर्यंत पोहोचण्याचा संकल्प केला.
