साहिल वाकोडे मृत्यू प्रकरणाची स्वतंत्र चौकशी करा
आरक्षित प्रवर्गातील प्राध्यापकांची रिक्त पदे तातडीने भरा; आमदार राजकुमार बडोले यांची मागणी
मुंबई,(अनिल मुनीश्वर):
दि. २३ सप्टेंबर २०२६ : आयआयटी मुंबई (पवई) येथील द्वितीय वर्षाचा विद्यार्थी साहिल रवींद्र वाकोडे यांच्या मृत्यू प्रकरणाची स्वतंत्र, निष्पक्ष आणि सर्वंकष चौकशी करण्यात यावी. तसेच संस्थेतील अनुसूचित जाती (SC), अनुसूचित जमाती (ST) आणि इतर मागासवर्गीय (OBC) प्रवर्गातील प्राध्यापकांची रिक्त पदे तातडीने भरावीत, अशी मागणी अर्जुनी-मोरगावचे आमदार राजकुमार बडोले यांनी केली आहे. २०२४ च्या विधानसभा निवडणुकीत बडोले अर्जुनी-मोरगाव मतदारसंघातून विजयी झाले असून ते सध्या आमदार आहेत.
साहिल वाकोडे यांच्या मृत्यूच्या पार्श्वभूमीवर आमदार बडोले यांनी आयआयटी मुंबईच्या संचालकांसह संबंधित वरिष्ठ अधिकाऱ्यांशी चर्चा केली. यावेळी प्राध्यापकांची रिक्त पदे, SC, ST व OBC प्रवर्गांचे प्रतिनिधित्व, विद्यार्थ्यांच्या कल्याणकारी सुविधा, वसतिगृह व्यवस्था, Students’ Wellness Centre, तक्रार निवारण यंत्रणा तसेच विद्यार्थ्यांच्या मानसिक आरोग्याशी संबंधित विविध मुद्द्यांचा आढावा घेण्यात आला.
जातीय छळाच्या आरोपांची निष्पक्ष चौकशी आवश्यक
साहिल यांच्या कुटुंबीयांनी त्यांच्या मुलाला जातीय भेदभाव व मानसिक छळाला सामोरे जावे लागल्याचे आरोप केले आहेत. या तक्रारीनंतर पवई पोलिसांनी आत्महत्येस प्रवृत्त केल्याच्या आरोपांसह SC/ST अत्याचार प्रतिबंधक कायद्यातील तरतुदींनुसार गुन्हा दाखल केला आहे. प्रकरणाचा तपास नंतर मुंबई पोलिसांच्या गुन्हे शाखेकडे वर्ग करण्यात आला असून ACP दर्जाच्या अधिकाऱ्याच्या नेतृत्वाखाली तपास सुरू असल्याचे वृत्त आहे.
कुटुंबीयांचे आरोप हे तपासाचा विषय असून त्याबाबत अंतिम निष्कर्ष तपासातील पुरावे आणि न्यायालयीन प्रक्रियेतूनच स्पष्ट होणार आहेत. दरम्यान, गुन्हे शाखेकडून साहिलच्या मृत्यूपूर्वीच्या घटनाक्रमाची पडताळणी करण्यासाठी सीसीटीव्ही फुटेज, डिजिटल व परिस्थितीजन्य पुरावे तसेच संबंधित व्यक्तींचे जबाब तपासले जात आहेत.
“एका घटनेवर किंवा एका पुराव्यावर निष्कर्ष न काढता मृत्यूपूर्वीच्या संपूर्ण घटनाक्रमाची साखळी तपासली पाहिजे. कोणतीही बाब दुर्लक्षित राहता कामा नये,” अशी भूमिका आमदार बडोले यांनी मांडली.
साहिलचे कुटुंबीयांशी झालेले संभाषण, मोबाइल व उपलब्ध डिजिटल माहिती, ई-मेल, कॉल रेकॉर्डसंबंधी उपलब्ध कायदेशीर माहिती, सीसीटीव्ही फुटेज, परीक्षा कक्षातील घटनाक्रम, सहविद्यार्थी व संबंधित प्राध्यापकांचे जबाब तसेच अन्य परिस्थितीजन्य पुराव्यांचा एकत्रित विचार करण्याची मागणी त्यांनी केली.
अंतर्गत चौकशीत कुटुंबीयांची बाजू ऐकावी
आयआयटी मुंबईकडून या प्रकरणाशी संबंधित कोणतीही अंतर्गत चौकशी करण्यात येत असल्यास साहिलच्या कुटुंबीयांना आपली बाजू मांडण्याची आणि त्यांच्याकडे उपलब्ध पुरावे सादर करण्याची संधी देण्यात यावी, अशी मागणी बडोले यांनी केली.
“कुटुंबीयांचे म्हणणे आणि त्यांच्याकडील परिस्थितीजन्य पुरावे विचारात घेऊनच चौकशी सर्वंकष झाली पाहिजे. सर्व संबंधित पक्षांना आपली बाजू मांडण्याची संधी मिळणे आवश्यक आहे,” असे त्यांनी सांगितले.
आयआयटी मुंबईतील ४८३ प्राध्यापक पदे रिक्त
आयआयटी मुंबईतील प्राध्यापकांच्या रिक्त पदांचा प्रश्नही आमदार बडोले यांनी उपस्थित केला आहे. आयआयटी मुंबईने केंद्रीय शिक्षण मंत्रालयाला नोव्हेंबर २०२४ मध्ये दिलेल्या अधिकृत माहितीनुसार, ३१ ऑक्टोबर २०२४ रोजी संस्थेतील १,२२५ मंजूर प्राध्यापक पदांपैकी ७४२ पदे भरलेली, तर ४८३ पदे रिक्त होती. संस्थेने त्या माहितीत SC/ST/OBC प्रतिनिधित्व निर्धारित प्रमाणात पूर्ण न झाल्याचेही नमूद केले होते.
“राष्ट्रीय महत्त्वाच्या आयआयटीसारख्या उच्च शिक्षण संस्थेत SC, ST आणि OBC प्रवर्गांसाठी उपलब्ध पदे दीर्घकाळ रिक्त राहणे चिंतेची बाब आहे. पात्र उमेदवारांसाठी विशेष भरती मोहीम राबवून संविधानिक आरक्षणाच्या तरतुदींची प्रभावी अंमलबजावणी सुनिश्चित करावी,” अशी मागणी बडोले यांनी केली.
२१ निवासी वसतिगृहांमध्ये १३ हजारांहून अधिक विद्यार्थी
आयआयटी मुंबईच्या Hostel Affairs Council च्या अधिकृत माहितीनुसार संस्थेच्या परिसरात २१ Residence Halls असून १३ हजारांहून अधिक विद्यार्थी निवासी आहेत. एवढ्या मोठ्या विद्यार्थी समुदायासाठी मानसिक आरोग्य सेवा, समुपदेशन, तक्रार निवारण आणि आपत्कालीन सहाय्य व्यवस्था अधिक सक्षम असणे आवश्यक असल्याचे बडोले यांनी म्हटले आहे.
Students’ Wellness Centre अधिक प्रभावी करणे, प्रशिक्षित समुपदेशक व मानसिक आरोग्य तज्ज्ञांची उपलब्धता वाढविणे, SC/ST Cell अधिक सक्रिय करणे तसेच विद्यार्थ्यांसाठी सुलभ, गोपनीय आणि विश्वासार्ह तक्रार निवारण व्यवस्था निर्माण करण्याची गरज त्यांनी व्यक्त केली.
मुख्यमंत्र्यांकडे स्वतंत्र चौकशीची मागणी करणार
“साहिल वाकोडे यांच्या मृत्यूमागील संपूर्ण सत्य समोर आले पाहिजे आणि त्यांच्या कुटुंबाला न्याय मिळाला पाहिजे. पोलिस आणि गुन्हे शाखेचा तपास कायद्यानुसार सुरू राहील; मात्र या घटनेशी संबंधित संस्थात्मक बाबींचीही स्वतंत्र, पारदर्शक आणि निष्पक्ष चौकशी झाली पाहिजे. या प्रकरणाच्या गंभीरतेबाबत महाराष्ट्राच्या मुख्यमंत्र्यांची भेट घेऊन सखोल चौकशीची मागणी करणार आहे,” असे आमदार राजकुमार बडोले यांनी सांगितले.
FIR मधील आरोप, कुटुंबीयांचे म्हणणे, उपलब्ध परिस्थितीजन्य पुरावे, सीसीटीव्ही फुटेज, मोबाइल व अन्य डिजिटल पुरावे, विद्यार्थ्यांचे व प्राध्यापकांचे जबाब तसेच आयआयटी प्रशासनाची बाजू यांचा एकत्रित आणि निष्पक्ष विचार करून वस्तुस्थिती समोर आणावी, अशी मागणी त्यांनी केली.
AGMNEWS24
बातम्या व जाहिरातीसाठी संपर्क
मो. 9420873630
