आज पाणी वाचवले नाही, तर उद्या एक लिटर पाण्यासाठी १०० रुपये मोजावे लागतील — आमदार विनोद अग्रवाल
चुलोद येथे जलपूजन व वृक्षारोपण; जलसंवर्धन, वृक्षारोपण व स्वच्छतेची ग्रामस्थांना सामूहिक शपथ
गोंदिया(अनिल मुनीश्वर):—–
दि. २० ऑगस्ट २०२६ : महाराष्ट्र शासनाच्या मृद व जलसंधारण विभागाच्या वतीने १५ ते २१ ऑगस्टदरम्यान राबविण्यात येत असलेल्या जलसंधारण सप्ताह अभियानांतर्गत माजी मुख्यमंत्री सुधाकरराव नाईक यांच्या जयंतीनिमित्त गोंदिया विधानसभा क्षेत्रातील चुलोद येथे जलसंवर्धन जनजागृती कार्यक्रमाचे आयोजन करण्यात आले.
यावेळी आमदार विनोद अग्रवाल यांच्या हस्ते गावातील तलावात जलपूजन तसेच वृक्षारोपण करण्यात आले. यानंतर उपस्थित ग्रामस्थांना जलसंवर्धन, अधिकाधिक वृक्षारोपण, स्वच्छता आणि गाव हिरवेगार व जलसमृद्ध करण्याची सामूहिक शपथ देण्यात आली.
पाणी, जंगल आणि जमीन वाचविण्याची गरज
ग्रामस्थांना मार्गदर्शन करताना आमदार विनोद अग्रवाल म्हणाले की, भारत नैसर्गिक संपत्तीने समृद्ध देश आहे. मात्र आधुनिकतेच्या शर्यतीत पाणी, जंगल आणि जमीन यांसारख्या नैसर्गिक साधनसंपत्तीचा मोठ्या प्रमाणात ऱ्हास होत आहे. आपल्या पूर्वजांनी गावांमध्ये सिंचन व पाणीपुरवठ्यासाठी तलाव निर्माण केले; मात्र आजच्या बेपर्वाईमुळे अनेक जलस्रोत अस्तित्व गमावण्याच्या उंबरठ्यावर आहेत.
भूजल पातळी सातत्याने खालावत असून ही भविष्यातील पिढ्यांसाठी गंभीर चिंतेची बाब आहे. त्यामुळे प्रत्येकाने पाण्याचा प्रत्येक थेंब जपण्याची गरज आहे, असे त्यांनी सांगितले.
शेतीच्या पद्धतीतही बदल आवश्यक
शेतीमध्येही बदलाची गरज असल्याचे सांगत आमदार अग्रवाल यांनी नैसर्गिक व सेंद्रिय शेतीला प्रोत्साहन देण्याचे आवाहन केले. रासायनिक खतांच्या वाढत्या वापरामुळे जमिनीच्या गुणवत्तेवर परिणाम होत असल्याचे त्यांनी नमूद केले. पिकपद्धतीत बदल करून भातासोबतच रोख पिकांकडेही शेतकऱ्यांनी लक्ष द्यावे, असे आवाहन त्यांनी केले.
तलावातील गाळ शेतांसाठी वरदान
चुलोद तलावाचा उल्लेख करताना आमदार अग्रवाल म्हणाले की, दीर्घकाळ दुर्लक्षित राहिलेला हा तलाव जवळपास मृतप्राय झाला होता. मात्र खोलीकरण व जलसंधारणाच्या कामामुळे तलावात पुन्हा जलसाठा निर्माण होऊन त्याला नवसंजीवनी मिळाली आहे.
तलावातून काढण्यात येणारा गाळ हा वाया जाणारा पदार्थ नसून शेतांसाठी वरदान आहे. हा गाळ शेतजमिनीत वापरल्यास मातीची सुपीकता वाढण्यास आणि पीक उत्पादनाला फायदा होऊ शकतो, असे त्यांनी सांगितले.
“पाणी वाचवा, भविष्यातील पिढ्या वाचवा”
पाणी हे केवळ नैसर्गिक साधन नसून जीवनाचा आधार असल्याचे सांगत आमदार विनोद अग्रवाल यांनी ग्रामस्थांना सतर्क केले.
“आज आपण पाणी वाचवले नाही, तर उद्या एक लिटर पाण्यासाठी १०० रुपये मोजावे लागण्याची परिस्थिती निर्माण होऊ शकते,” असा इशारा त्यांनी दिला.
प्रत्येक नागरिकाने पाण्याची बचत करावी, जलस्रोतांचे संरक्षण करावे आणि अधिकाधिक झाडे लावावीत, असे आवाहन त्यांनी केले.
कार्यक्रमाच्या शेवटी उपस्थित ग्रामस्थांनी जलसंवर्धन, वृक्षारोपण, स्वच्छता आणि गाव हिरवेगार व जलसमृद्ध करण्याची सामूहिक शपथ घेतली.
यावेळी पंचायत समिती सभापती मुनेश रहांगडाले, जिल्हा परिषद सदस्य ममताताई
वाढवे, पंचायत समिती सदस्य कनीराम तावाडे, चुलोदच्या सरपंच मायाबाई बोरकर, एपीएमसी संचालक राधाकृष्ण ठाकुर, गोविंदभाऊ ठाकुर, मृद व जलसंधारण विभागाचे उपअभियंता राहुलकर, तलाठी लँजे मॅडम, विजय ठाकुर, पोलीस पाटील कविता भालाधरे, संजय बिसेन यांच्यासह मोठ्या संख्येने ग्रामस्थ उपस्थित होते.
